ໃນຕອນເຊົ້າມື້ວານນີ້(ວັນທີ 28ມັງກອນ 2021)ກົງກັບວັນພະຫັດ(ວັນບຸນມາຄະບູຊາ) ເພັງ 15 ຄໍ່າເດືອນສາມ ພສ 2564 ຊາວພຸດຈາກທຸກສາລະທິດໄດ້ຮ່ວມກັນທໍາບຸນຕັກບາດທີ່ສະຖານບູຮານ ວັດພູຈໍາປາສັກ ເພື່ອສືບສອດປະພຶດປະຕິບັດຕາມຮີດຄອງປະເພນີ ທີ່ມີມາແຕ່ດົນນານ. ສໍາລັບປີນີ້ກ່ໍໄດ້ມີຊາວພຸດມາຮ່ວມງານບຸນວັດພູ ແລະທໍາບຸນໃສ່ບາດຢ່າງຫຼວງຫຼາຍຄືປີຜ່ານມາ ຕ່າງແຕ່ປີນີ້ຕ້ອງໄດ້ປະຕິບັດມາດຕະການປ້ອງກັນ ແລະໄສ່ຜ້າປິດປາກ,ດັງ ແລະອື່ນໆເພື່ອເປັນການປ່ອງກັນພະຍາດ ໂຄວິດ19 ເຊິ່ງໃນພິທີໃສ່ບາດຄັ້ງນີ້ມີ ທ່ານ ປອ ວິໄລວົງ ບຸດດາຄຳ ເຈົ້າເເຂວງໆຈຳປາສັກ,ບັນດາການນໍາແຂວງ,ເມືອງ,ພະແນກການກົມກອງອ້ອມຂ້າງ ແລະຊາວພຸດລາວເຂົ້າຮ່ວມຢ່າງຫຼວງຫຼາຍ.
ໃນພິທີ ພຣະອາຈານ ມະຫາ ສຸວັນ ຈັນທະຣາຊ ປະທານອົງການພຸດທະສາສະໜາສໍາພັນລາວ ແຂວງຈໍາປາສັກ ໄດ້ນໍາພາຄະນະສົງຈໍານວນ 500 ອົງ ແລະອອກຕົນຍາດໂຍມທັງຫຼາຍໄຫວ້ພຣະຣັດຕະນະໄຕ,ຮັບສິນ,ຮັບພອນ,ຮັບການຖວາຍທານ ທີ່ເປັນປັດໄຈຕ່າງໆ ຈາກນີ້ກໍໄດ້ຍ່າງບິນທະບາດ ຈາກບໍລິເວນໂຮງຊາວລົງຮອດແຄມໜອງສະ ໂດຍມີອອກຕົນຍາດໂຍມຮ່ວມໃສ່ບາດຢ່າງຫຼວງຫຼາຍ.
ການທໍາບຸນຕັກບາດທີ່ສະຖານບູຮານວັດພູຈໍາປາສັກ ເປັນການສືບທອດຮີດຄອງປະເພນີວັດທະນະທໍາອັນດີງາມຂອງຊາດ ທີ່ຊາວເມືອງກໍຄືແຂວງຈໍາປາສັກສືບທອດມາແຕ່ບູຮານນະການ ໃຫ້ຄຽງຄູຢູ່ກັບຄົນລາວຕະຫຼອດໄປ ຈາກນີ້ກໍເປັນການອຸທິດສ່ວນກຸສົນ ແລະສີລິມົງຄົນໃຫ້ແກ່ຕົນເອງ ແລະຄອບຄົວໃຫ້ຢູ່ດີມີສຸກ ທັງເປັນການເຜີຍແຜ່ວັດທະນະທໍາ ແລະດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມວັດພູມໍລະດົກໂລກແຫ່ງທີ 2 ຂອງລາວໃຫ້ນັບມື້ຫຼາຍຂຶ້ນ ອີກດ້ວຍ.ຜູ້ເຂົ້າຮ່ວມທໍາບຸນຕັກບາດໄດ້ໃຫ້ສຳພາດໂດຍສະແດງຄວາມຮູ້ສຶກຂອງຕົນດີໃຈທີ່ໄດ້ມາບຸນໃນຄັ້ງນີ້.ສຳລັບຕອນຄ່ຳຂອງວັັນດຽວກັນນີ້ຍັງໄດ້ມີການແຫ່ວຽນທຽນໃຕ້ທູບທຽນເພືີ່ອເປັນການສັກກາລະບູຊາແດ່ສິ່ງສັກສິດຕາມສັດທາຂອງຕົນອີກດ້ວຍ.
ຂຽນ: ນ. ປະພິດ ສີສົມບູນ
Recent Comments